A nivel mundial, o número de persoas que viven en situación de extrema pobreza diminuíu desde un 36 % en 1990 ata un 10 % en 2015. Non obstante, o ritmo ao que se produce este cambio está diminuíndo, e a crise da COVID-19 pon en risco décadas de progreso na loita contra a pobreza. Unha nova investigación publicada polo Instituto Mundial de Investigacións de Economía do Desenvolvemento da Universidade das Nacións Unidas advirte de que as consecuencias económicas da pandemia mundial poderían incrementar a pobreza en todo o mundo ata chegar a afectar a 500 millóns de persoas máis, ou o que é o mesmo, a un 8 % máis da poboación total mundial. Esta sería a primeira vez que a pobreza aumente en todo o mundo en 30 anos, desde 1990.

Máis de 700 millóns de persoas, ou o 10 % da poboación mundial, aínda vive en situación de extrema pobreza a día de hoxe, con dificultades para satisfacer as necesidades máis básicas, como a saúde, a educación e o acceso a auga e saneamento, por nomear algunhas. A maioría das persoas que viven con menos de 1,90 dólares ao día viven na África subsahariana. En todo o mundo, os índices de pobreza nas áreas rurais son do 17,2 %; máis do triplo dos mesmos índices para as áreas urbanas.

Para os que traballan, o seu posto de traballo non lles garante unha vida digna. De feito, o 8 % dos traballadores de todo o mundo, e as súas familias, vivían en situación de extrema pobreza en 2018. Un de cada cinco nenos vive en situación de extrema pobreza. Garantir a protección social de todos os nenos e outros grupos vulnerables resulta crucial para reducir a pobreza.